Zur aktuellen Situation und zur Zukunft der Sprachenvielfalt in der Schweiz

Abstract

La varietad, betg mo da linguas naziunalas, è ina realitad ed in enritgiment da la Svizra e dal chantun Grischun uffizialmain triling. Ina realitad è dentant er, che las differentas linguas vegnan duvradas per gronda part ina sper l’autra e na stattan savens betg en barat. Il status giuridic dal rumantsch è oz bun. L’implementaziun pratica en pliras domenas (administraziun, economia, novas medias) è però marginala u inexistenta. La scola rumantscha, dapi ditg ina scola bilingua gia sin il stgalim primar, vegn adina pli fitg sut squitsch da refurmas e discussiuns davart l’instrucziun da linguas estras. La Rumantschia sto perquai chattar urgentamain respostas a la dumonda “Tge scola rumantscha futura vulain nus?” Svilups demografics sco la depopulaziun da valladas rumantschas e l’exodus en la diaspora tudestga, ma er fusiuns da vischnancas e reorganisaziuns da regiuns èn grondas sfidas per la Rumantschia. Sche nus na chattain betg strategias da far frunt a questas sfidas, vegn la chapientscha vicendaivla ed il barat da la Rumantschia cun las autras gruppas linguisticas da la Svizra a succeder en avegnir surtut per tudestg.