Il romontsch – ina prominenza nunenconuschenta

Résumé

«Ils Romontschs che nus entupein a Berna ein urbans, aviarts e poliglots. Ozildi ei romontsch cult, sco per exempel quels hip-hoppers romontschs ch’ins auda el radio ni vesa ella televisiun: quels ein ,in’». Quei manegia in collaboratur dalla Canzlia federala. Vinavon gi el lu aunc: «Gl’ei schon legher co vus navigheis cun quei lungatg aschia ‚by the way‘». Jeu sun perplexa e realiseschel che miu collaboratur ei buca pertscharts ch’il romontsch ei nies lungatg mumma e pia lungatg da famiglia. Ed el ei surstaus cu el auda che mes geniturs discurrevan cun nus romontsch – e mo romontsch. «Aber fagend termagls tschintschavas guess tudestg, ni buca?» damonda el. Na, na, co fuss ei stau pusseivel da dar giugs, far da sezuppar ni emprender dad ir cun skis auter che per romontsch? Tudestg havein nus gie empriu pér en scola – sco nos cumpatriots ella Svizra franzosa ni taliana. Per nus ei e resta il tudestg in lungatg jester. «Uff, quei ei gie bunamein pli dir che pils Secondos!» excloma miu collaboratur.